Jackass 97

在碟舖忍笑忍得好辛苦 -- monchowchow

2008-10-08T04:29:00.001+08:00

大日子 -- monchowchow

2008-09-06T05:37:00.006+08:00

更多照片，到此瀏覽。

鬼屋 --- 維加特

2008-09-05T17:56:00.001+08:00

咁既鬼屋, 死都要住啦

遲左少少 - 燒賣

2008-08-28T03:17:00.001+08:00

套戲好似仲未落, 應該未算好遲

鳥巢內的花樣年華--monchowchow

2008-08-27T01:21:00.002+08:00

http://forum2.hkgolden.com/view.aspx?message=1335030&highlight_id=0&page=1

如果我係姚明，Lauren Jackson同葉莉？唔剩講啦~~

車路士 --- 維加特

2008-08-26T14:36:00.003+08:00

最近無乜特別野, 是但放張相響應下,
當日入坐情況大慨係一半左右
南北翼係贈劵位, 坐滿人
東西翼係公眾賣飛位, 坐得十分一人左右

所以話, 係澳門攪大型活動, 真係實蝕無痴牙

唔想煩執屎，養隻獅子丸 -- monchowchow

2008-08-25T02:49:00.003+08:00

宜家d學生都好爆吓, 前途無限啊 - 燒賣

2008-08-23T00:43:00.001+08:00

well done 啊, 隊長!

明天把你佔有 -- monchowchow

2008-08-22T05:04:00.001+08:00

忽然貼圖周：美女走光 -- monchowchow

2008-08-19T01:14:00.001+08:00

力掙救blog 行動- 卡窿一索/板男根/屌板事件 - 潮語咭 (by 燒賣)

2008-08-18T10:41:00.006+08:00

忽然貼圖周 -- monchowchow

2008-08-18T05:03:00.001+08:00

為了拯救呢個垂死既blog，我在此召噢有心人每天post一幅圖，欽此。

我以後唔會再掂lego了（應該） -- monchowchow

2008-08-05T22:35:00.004+08:00

詳細情形去看我的blog吧！

無聊一貼 - 燒賣

2008-06-01T03:41:00.001+08:00

會唔會想學泰文?

我個大仔 (懵炳) -- +2

2008-05-03T00:33:00.002+08:00

聽cc講我同恐龍仔篇報導上左jackass

咁都俾你見到算你時運高

正式向大家介紹, 我兩歲半嘅大仔 ~ 懵炳

先知先覺 -- monchowchow

2008-04-26T06:32:00.003+08:00

內地新近潮語「做人不要太CNN」，其實好多年前我地一個澳門團已經用過，就係：

做人不要太「N」……（中招者是+2）

如果可以收版稅，我地真係發到豬頭了。

有人上報都唔出聲！--monchowchow

2008-02-28T20:01:00.002+08:00

【轉載自8月21日星島日報】

不少新婚夫婦在蜜月期過後，都會遇上話題減少，甚至溝通出現問題等困局。黃生與黃太（左圖）結婚兩年，相識超過十年，平日各為工作而忙碌，閒談話題亦環繞工作為主，夫妻生活漸趨乏味，「我們已很熟悉對方，說真的，日常生活話題愈來愈少。」黃太說。然而，自從三個月前，屋企增添了一名新家庭成員——「矇炳」後，情況就大大改變了。
矇炳是從香港兔友協會領養的小兔仔，夫婦二人一眼便看中牠，被牠那矇樣吸引了。黃太說：「我們希望增添家庭成員，讓這個家熱鬧點，但又未有準備生小朋友，所以決定領養動物。」她續說：「我們很喜歡有毛的動物，但狗仔要有較多活動空間，貓隻又覺得牠們太高竇，所以選擇了兔仔。」
這名新家庭成員，為黃生黃太帶來了無窮樂趣，黃生說：「我們經常分享矇炳的趣事，例如牠的有趣睡姿，又會一齊商量買甚麼食物給牠吃，要為牠準備甚麼用品等，話題都多了。」黃太表示：「以前放假經常出街，現在較多留在家中陪矇炳玩，家庭凝聚力大了，屋企氣氛比以前和諧，自己亦開心了。」黃生表示，自從當上矇炳「爸爸」後，有感自己責任大了，每樣事情都要為牠安排，就好像照顧小朋友一樣，在公司工作晚了，亦會念掛覑矇炳，希望盡快趕回家照顧牠。黃太坦言，丈夫工作壓力大，平日較少笑容，自從矇炳加入後，他笑容多了，心情也輕鬆了不少。

香港都市傳聞 - 燒賣

2008-01-16T16:02:00.000+08:00

1.七姊妹
傳說百多年前，七姊妹海灣(今七姊妹道)是一個漁村，當中有七個年青的少女情比金堅，結義金蘭，大家的共通點，就是自小喪父喪母，大家便住在一起，互相召應，於是在"七姐誕"當天對天發誓:不能同年同月同日生，但願同年同月同日死。自此之後，大家關係更好，人人稱他們"七姊妹"。可惜好景不常。一天，一班惡霸到這村搗亂，七姊妹奮力對抗，尤見七妹更為落力，那班惡霸的首領看中了七妹，並令三天內娶他過門，七姊妹互相抱擁痛哭了三日三夜，大概第三天的晚上，六位姊妹設法為七妹解圍，盡量阻撓惡霸的花大轎，以拖延時間，好讓七妹盡快逃走，可惜惡霸不足三兩下功夫就把六位姊妹擊退，由於天幕已黑，六位姊妹唯有拖著七妹向前走、向前走，走到最盡，原來是七姊妹海灣，前無去路，後有追兵，七姊妹把心一橫，走到最大的那一塊岩石上，齊心地叫:不能同年同月同日生，但願同年同月同日死。之後，七姊妹手牽手，從大石上跳落海中，那班惡霸見到此情形，因畏罪，怕人以為是他們幹的，不足兩天，所有兄弟有他們的居所內剌腹自盡，而七姊妹的屍體就在七天後手牽手浮上水面，他們跳海的地方，正是現今七姊妹道與模範里的交界。

1.1七姊妹ver2
北角七姊妹的故事：
話說......

911事件發生時,ATV立即直播,而TVB繼續播七姊妹(向海嵐主演),第二日比人罵到七彩...完

2.狐仙
香港一時的出現狐仙的地方(聞說現存於粵華酒店 67-75 渣華道北角)
事源於１９８１年，
於虎豹別墅, 當時別墅外有很多畫,，工人每朝早都會抺牆上邊既畫，有一夜, 雷電交加, 天上閃過不正常光線，翌日，工人如常抺畫, 豈料發現牆上有(約7個)狐狸頭，工人見狀大驚, 立即通知其他人, 但一眾到來到時已不見狐狸頭，有學道人士立即用黃紙將石頭封住。後來於溫莎公爵大廈 (即皇室堡，易名於十年前左右)
當時出現由於太多人圍觀一幅出現數個狐狸頭的雲石，公司亦因為看到來觀看孤仙的市民太多而被迫停業了一天。保安後期用一塊布將雲石掩蓋，更於夜半時分，商場關門後拆掉整塊雲石平息風波。事有湊巧，更換大理石後，大廈商舖生意奇佳，成就了今天的皇室堡。期間，溫莎公爵大廈頂層某酒樓 (有傳是大廈對面的某酒樓)
這酒家常有父母為小孩擺滿月酒，但在那擺酒的小孩，都會死於非命，有指是狐仙索命。當中流出最多的傳聞是一對夫婦於該酒樓中擺滿月酒，但事後，紅眼睛尖牙狐仙出現於婦人的夢中，說該夫婦沒有向他敬酒，
要殺了小孩，一下子就把小孩咬死。婦人驚醒，發現嬰兒面色發青，並已沒有呼吸，夫婦見狀馬上把嬰兒送到醫院，送到醫院後證實嬰兒突發性死亡，有傳嬰兒沒有全身的血被吸乾。事件至今仍眾說紛紜。有傳當時的狐仙被高人封印在牆壁中，有傳當時有一位道士來港收伏其中兩隻較暴戾的狐仙，其餘的放生。但事件傳到台灣後，竟有不同的版本，這隻狐仙竟在台灣繼續修煉，究竟是否真有此事？某記者找到狐仙堂負責人葉老師查問。他表示，當年香港狐仙事件傳到台灣後，有一位大法師到香港把那狐仙帶到台灣陽明山放生，他說在十多年之前，確有狐仙在陽明山上修煉，而且不止一隻，但自從大法師仙逝後就沒有狐仙在那裏修煉了。
(燒賣:狐仙呢單野我都係睇"大迷信"先知,上面講果d有直頭無聽過,咩捉左去台灣放生...反而記得大迷信入面話狐仙去左棵唔知咩樹度,有橦大廈向住呢棵樹,呢橦大廈好多向住呢棵樹d單位入面d人唔係出事就殘障...講到似層層...)

3.彩虹站
彩虹站有三條路軌，不過大家有冇諗過為何個個站都只有二條路軌,唯獨是彩虹站有三條路軌而中間不行車?（有D站分開上下兩層唔當係)曾經有人說中間的路軌是供維修列車停站或行車,有人說是後備路軌……我敢話俾大家聽,其實佢地的答案都係錯,1979年,大家還記得當時地鐵通車，只有觀塘線（即由觀塘站至>彩虹站)，其實在正式通車前就發生了一件怪事。當時地鐵建設好路軌後，就由一位元工程師、二位元車長及一名觀塘站站長試車。還有其他員工、工程師及公司職員在觀塘站守候著列車到達。列車由彩虹站開出，第一個經過的站是九龍灣站，兩站的相距只有二、三分鐘左右,不過……好奇怪，九龍灣站的職員遲遲還未見到列車到達，彩虹站職員報告確定列車經已開出進入隧道。用通訊機聯絡車上的人，傳來的只有沙沙聲。十分鐘後，終於見到列車，九龍灣站的職員第一時間截停列車。正當上前查問車上的人時候，車上的人慢慢地步出列車，面上都顯得青白無血色，神情呆滯，口部不停地震動。於是當日暫停試車，送這四人到醫院去，兩日後在醫院離奇死亡。醫生都不能肯定死亡原因，不用講地鐵公司不能查明當日所謂何事。消息好快傳到各個職員,大家都驚寒而律，無人肯再坐上列車上試車。當然不能草草了結此事，為了盡早通車，地鐵最高級的上司與兩名技術人員親自試車，結果換來同樣怪事，更同樣兩日後離奇死亡。地鐵公司有位很迷信的上司，就請了位高人到彩虹站查個究竟，那位高人看個手上的風水羅盤，驚慌地向迷信的上司說:「你們好事多為，好鑽唔鑽就正正鑽穿了鬼門關，我能力有限，唔盡早改道，只會有更多的人遇害」。高人所說的正正就是現在那條中間的路軌及其隧道。放是地鐵公司立即加設多條路軌在旁，形成今時今日的彩虹站。從此再沒有怪事發生。

4.太平山
太平山靈龜..相傳有某風水師定道士黎到香港,話香港食正龍脈,會大旺好多年,但有個劫,D人問點知個劫幾時黎,個風水師/道士就指住隻海龜,話呢隻龜每年會爬一粒米距離,爬到太平山頂香港會陸沉云云..D人去睇,原來係舊龜型石,返轉頭時個道士唔見左,留低呢個傳說..舊石唔知仲係唔係度

5.大會堂銅馬
匯豐總行前身係大會堂黎,果時出邊有隻大銅馬成精,夜半為祟飲海濱飲水...呢單野真係百年以上,果時仲話嚇到班打更佬hihi,後來請道士作法,封左隻馬...

6.家姐被炒
我家姐一路都在太古廣場一間名牌做sales
間店有好多有錢人同名人幫襯
做了很多年，已經是senior
咁多年黎都好俾心機做，經理亦好like佢
因為收入不錯又隱定，家姐原本諗住同拍拖多年既bf結婚
咁多年黎我家姐好少俾人投訴
而且同好多大客既關係都唔錯
前排關心研去過我家姐間店幫襯
不過serve佢既不是我家姐，但佢一買就買左好多野
過左個幾星期，佢又再去間店行
上次serve果個Day-off, 咁我家姐就頂上serve佢
開頭已經好有禮貌介紹d新貨俾佢, 仲話俾折頭佢
佢就無乜反應，望一望另一堆客
果堆客係大陸人，三至四個，講野好大聲
關小姐就同我家姐講話可唔可以關左間鋪一陣
等佢揀衫
我家姐同我講，佢公司一向唔俾佢地咁做
驚做壞個頭，除非真係有乜大人物，好多記者好混亂先可以咁做
但佢見到關小姐黑口黑面，都識做話打電話去問一問老闆
老闆梗係話唔得啦，至多俾多d折頭她
咁關小姐就發老脾，鬧到我家姐一面屁
d說話勁難聽，又話自己買野既錢多過我家姐搵幾年既錢
我家姐都唔敢得罪佢，一味道歉
跟住關小姐就走左人，家姐就同老闆備案
老闆了解左情況就無再追問
過左兩日佢接到老闆電話話收到complaint
話有人投訴佢態度唔好，唔理顧客感受
公司policy一向唔話俾佢地知係邊次事件
我家姐估黎估去都淨係得失過關小姐一人
總之俾老闊話左兩句
又過幾日，關小姐又黎
這次和件西裝友一齊，但好在成店都無其他客
我家姐怕又惹事，叫左個junior過去serve佢
點知條老西友係要點番我家姐serve.
根住關小姐就玩野，試衫，但話d衫俾其他人試過污糟
要開新衫試，我家姐雖然知公司唔俾咁做，
但怕左佢，唯有照做
點知試左兩三件，件件佢都要咁試又無話要
我家姐終於話唔好意思，其實唔可以咁做
(根本明知她玩野啦.....)
又係至多俾多d折頭佢
跟住佢件西裝友就鬧我定姐話"係咪話我地無錢買你地d野?"
我家姐話唔係，但佢照鬧
鬧左十幾分鐘
d同事見咁幫手，又照鬧
最終打俾老闆備案
之後連收兩封warning letter
早兩日接埋大信封
年尾俾人炒左

7.街霸2傳聞 ( 8人版 )
阿隆個場有塊寫住"風林火山"的木板,如果爛左但未消失的話可以用塊木板拍人而且即死的....
電腦隻軍佬到某段時間會意圖行埋黎撻人相信打開的人都知,如果成功阻止到佢5次的話就會拎把軍刀插你,都係即死....
春麗可以除左個手圈做武器,之後就算一個輕拳都等於你一個重拳
青狼個場有條大蟒蛇,如果佢ga頭轉方向超過10次的話 ( 一左一右為1次 )青狼所有攻擊都會有毒性,即係比佢打中就會中毒慢慢扣血.......
蘇聯佬有招隱藏技可以叫高巴卓夫出黎 ( 即係前蘇聯總統 ),開頭都冇特別,但只要你打中佢的話就會有一堆軍隊衝出黎打你
本田個場有個大浴缸,如果本田用中拳撻果種成功撻左入浴缸的話就會暈 ( 但暈到死為止... ) ,其他人都可以撻返本田入浴缸都係會暈但分別係只會暈一次而且即刻滿血....
阿ken個場有個油筒,有時撞中的話會著火但唔扣血的,如果ken呢個時候中的話有機會變成火ken,你掂親佢都會著火同扣血
印度佬在自己個場時如果得返一滴血的話只要跳高時轉3個圈及個位剛好在其中一隻大象頭頂的話就會出到隱藏招"萬象聖火"好似平時的41236拳果招咁但佢騎左大象上仲要個火係全畫面判定而且維持時間係到你死為止.......仲有一個係唔知大家有冇留意印度佬個場有兩個金色痰罐的,如果打起對手時剛好個頭位置在痰罐位置的話個頭會塞左入去 ,到時就會永遠都除唔到而且一直係氣絕狀態就算過左下一round都係咁,到結果畫面時個頭仲係塞左入個痰罐到
跟住係電腦的隱藏野,因為第一隻街霸2係冇得用4天王的 ( 改版例外 )
打拳佬時如果第3 round超過100萬的話佢會著禮服同你打,同普通版分別係所有攻擊都係連hit的 ( 即係中佢一拳就=死 )
爪佬識爬鐵絲網相信打開的人一定知,不過原來你都可以wo ,只要佢爬果陣你直跳64648+重pk就得啦,成功的話就會爬到gala而且你都享有佢ga優惠就係完全無敵
泰皇好似冇,可能我未聽過...
同司令draw game 10 round的話就會有隱藏人昇龍出現,都係街霸二中最轟動的秘技 ( 因為連相都有 ),draw10 round唔係冇可能因為以前係可以無限draw的,問題係之後有人踢爆左呢個秘技係假的……

8.屯門
由屯門公路到三聖, 差不多到友愛時, 係一條落鈄既大鈄路,好奇怪(邪?) 每逢到呢個位, 坐巴士既人自自動動識醒落車
(純粹攪笑?)

8.動物
傳聞馬會D馬同熊貓安安佳佳都係由人扮的

(information from forums)

ANGKOR - 維加特

2008-01-14T10:43:00.000+08:00

工作關係純粹路過
只可以走馬看花
站在古蹟裡面, 真係有種震撼的感覺
下次旅行真係可以諗諗

另外發現到處都有周慕雲用黎講秘密的"lon"
夠晒方便

ANGKOR

2008-01-14T10:26:00.000+08:00

十年jackass布吉之旅（完結篇）-- monchowchow

2007-11-05T20:00:00.000+08:00

第三日起到身都差唔多中午，今日係諗住喪hea既。一心以為酒店有shuttle bus去東面既布吉城墟，結果坐咗差唔多20分鐘車到咗個大型商場Central Festival（起初以為布吉城就喺商場附近，後尾睇番map先知原來差幾遠）。

由於無食早餐，到咗Central Festival首先緊係醫肚，入咗間日本連鎖餐廳Zen，一於試吓呢樹既日本菜掂唔掂。d午餐set好抵，成盤壽司有湯有盛都係二三百珠，正！食完嘢就喺商場漫無目的咁逛咗兩個鐘，個商場好大，都幾多嘢買。雖然有d人認為布吉開發得太多，唔夠原始，不過我諗成個布吉有一個大商場都唔算過份吧，畢竟多個選擇都係好事嚟既。喺supermarket買咗好多野食諗住今晚飲酒時食，唔經唔覺就到咗回程時間喇（酒店shuttle bus只有一班）。

班女仔話好想游水喎，一番酒店就去咗泳池集合。其實邊有得游水吖，有個唔知係咪酒店既沙灘波喺池邊，就緊係玩數字球啦！再加上我哋後尾仲發明咗「水上半場藍球」玩法，六個人玩到喪哂，天黑都唔肯走，直到忽然橫風橫雨行雷閃電，唔走唔得。

玩完番房沖過涼，又到食飯時候（寫到呢樹我直頭覺得布吉係天堂……）。好彩酒店有遮，仲可以落patong食飯。話哂last night，緊係想食正宗泰國菜加蝦刺身啦，點知意想不到既事就出現咗喇。我哋喺patong左兜右兜，跟住本旅遊書行咗半粒鐘有多，竟然搵唔到有蝦刺身食！最後無辦法之下去咗bang la road附近一個熟食市場咁款既地方食海鮮，味道普通過唔普通，同第一日喺Savoey食嗰餐差好遠！真失敗……

番到酒店係時候吹埋剩餘既Chivas，伯誠介紹大家玩種叫「砰磅嘩」既枚，結果確診咗+2喺反應上真係有d問題，大家都為佢而難過……最後飲完支Chivas又成五點（！），好彩唔係早機。

當早上monchowchow半夢半醒既時候，喺塊鏡度見到燒賣同一個男人喺洗手間，個男人烏低身郁吓郁吓唔知攪乜……當monchowchow開始擔心自身安全之際，燒賣走埋嚟話：條屎渠塞咗！monchowchow起初唔知佢講既「屎渠」係指咩一回事，之後慢慢就嗅到真係好臭……嘩，原來係個廁所塞咗！而且唔係普遍塞，係連環幾間房一齊塞，乜咁攪呀！？由於過程太臭，唔想多講，酒店後尾都安排我哋換房，轉咗去泳池邊d貴房度瞓埋嗰兩三個鐘，好過無啦~~

起身之後執好野，原本諗住落patong食野兼租車去機場，但係伯誠就話擔心唔夠時間，monchowchow望望個落雨天，算啦，雖然酒店車貴d都算啦，都好過周圍搵車既（唔好話我哋雞婆，如果你試過趕唔到機而被迫揸住5000yen滯留大阪三天既話，就會明白我哋點諗）。喺酒店食埋午餐（又ok喎），就上車到機場去也。一路上無塞車，雖然落雨，回程架機都尚算定，而我哋既布吉之旅亦就此結束喇！

布吉最大的Shopping Mall -- Central Festival

Zen日本料理，d set lunch勁抵食！

女仔們買野，男仔都係食同玩

此張相影到好似d咩東莞偷跳團咁……

雖然叫Number one seafood，但實際味道麻麻

臨上機用公家錢買盒冬甩一人一個！

後記：
1. 泰東航班時間確實一流，但經過最近布吉空難呢單野（詳情見遊記第一回），我諗我唔會再搭。
2. 其實布吉好多地方我哋無行過，如果人數少d，布吉係應該玩五天以上既。
3. PP島有酒店留宿，都值得住吓，至少可以喺maya bay坐耐d，欣賞吓呢個世外桃源。
4. 食唔到蝦刺身，係今次旅行既遺憾，下次一定要喺資料搜集上做好d！
5. 呢次旅行一如以往，有苦有樂，不過事後諗番就會倍覺難得，尤其尾二嗰日喺酒店泳池喪玩，真係好耐都未試過笑得咁放！希望下年都可以攪多次旅行就好喇。

十年Jackass布吉之旅（2）-- monchowchow

2007-10-04T18:30:00.000+08:00

It was too beautiful...It 's like a tidal lagoon, it's sealed in by cliffs...totally fuckin' secret, totally fuckin' forbidden. -- Daffy (The Beach)

第二朝起身，天氣好似好過琴日。雖然只係瞓得三個鐘，但一諗起去Maya Bay就成個人醒哂。由於諗住喪玩，所以乜都唔帶，剩係攞咗酒店條pool towel就走人。喺酒店食buffet早餐，可能因為諗晚飲得太多酒，攪到無乜胃口，難得d蝦粥又幾好食喎，食咗四碗有多（無胃口……！？）。

一行人醫好肚出發，個tour有車到酒店接人，係架相當迫夾的麵包車。之後就開車到碼頭，搖吓搖吓搖咗成半粒鐘先到，攪到個個人幾乎瞓著咁滯。到咗碼頭見到個好似「泰國沖」咁款既肥仔（不過無載眼鏡），原來係我哋呢團既導遊，話要等多半個鐘集齊哂其他客先可以上船喎，無計啦，又等。望吓個天，嘩，乜今日咁陽光呀！？幾乎無雲咁滯，一干人等即刻攞支spf50出嚟上油先得。

終於等到上船喇，行上船途中有d人會幫你影相，然後就會將張相印落d杯杯碟碟度，等你回程時睇啱就買，價錢都好似係100珠左右，真係後悔無影到……！我哋呢團係坐大飛既，去pp島船程要45分鐘（如果坐大船要成兩個鐘！）班女仔驚曬坐哂入船倉，monchowchow同燒賣就幾大都坐船頭啦（拜拜啦夢幻左）！

講真，坐船頭真係有辣有唔辣，好既就係可以感受乘風破浪既快感，同埋可以望多d景，唔駛好似坐船倉咁望住堆拖鞋咁悶；唔好既就係撞啱好似呢日咁猛太陽，就真係曬鬼死喇~~（好彩有條毛巾頂頂啫）另外一樣唔好（睇人既）就係非常之拋，唔係講笑，真係刺激過坐過山車。喺船頭有家外國人，個阿媽直頭嚇到喊添！難為另一邊的monchowchow同燒賣就興奮到嘻嘻哈哈，真係可見香港人幾咁仆街呢你話……

話咁快pp島已經近在眼前，之前check過資料知道pp島分大小兩島，當monchowchow喺度諗緊Maya Bay會喺咩位置既時候，架大飛已經衝入山谷內一兜一轉…… 個個當堂O哂咀，因為Maya Bay已經出現咗喺眼前！望住眼前景色，心入面係咁叫痴線，因為實在太靚喇！（兩秒之後聽到船倉內的+2叫咗出嚟）的確，在這樣的天氣之下，Maya Bay真係美得叫人絕望……

由於Maya Bay屬於國家公園，所以肥仔導遊話只可逗留30分鐘咁多（我懷疑係因為泊船費好貴）。時間緊迫，影完相就即刻跳落水啦！不過可能因為遊客太多，落到水發覺無水上面望咁清，除非游到出泳區最開就會好d。不過游到出去發現嗰條只係普通麻繩而唔係防鯊網，個心立時怯一怯，都係游返去淺水處穩陣（我諗我係太受《迷幻沙灘》既劇情影響喇……）

好快就要離開Maya Bay繼續行程。首先到咗Viking Cave，不過只係喺洞外「裝裝吓」，無得上岸行；之後就去咗個山邊餵馬騮，又係無得落船，剩喺船頭餵幾條蕉就算（所以坐船頭係著數d就係咁解）。

之後去咗另一處海域玩浮潛，之前未玩過，不過識游水既應該兩三吓就上手。我哋喺海度游，個導遊就掟d麵包去我哋附近，跟住就會有勁多魚游過嚟搶食。一開始唔知仲懶醒揸住舊麵包，點知d魚衝埋嚟係咁施暴，真係痛架！不過第一次俾咁多魚包圍，真係好興奮！

玩咗半粒鐘左右，大飛就載我哋上pp島開飯。嗰樹應該係pp島既市集，有舖頭有食肆也有小旅館。玩到咁攰唔駛講緊係大吃一餐啦！tour包的套餐尚算可以（以旅行團質素嚟講）。食完野喺市集兜咗一陣，就出發去最後一站既蛋島喇。

蛋島面積好細，我懷疑兜一個圈唔駛十分鐘，不過就好多野玩：游水、浮潛、沙灘排球、曬太陽…… 其中浮潛確實正！就算坐喺淺水處，d魚都會喺你身邊游來游去，不過最好著蛙鞋、戴手套，我哋就兩樣都無，結果攪到損手損腳。可能因為潮退，d水流頗急，喺水度唔郁睇魚，忽然會發現自己去咗好出。想游番埋岸，d水流仲大力過你；想抓住海底d礁石借力，發現身邊嗰舊大石上有成千個蠔殼等住拮死你……

正因為咁，當要回程集合，全村人到齊而唯獨不見燒賣既時候，monchowchow同夢幻左就番去四圍搵，同時已作好最壞打算：買過西瓜掉落海，但求執番條屍就算……不過後尾個船家派人嚟叫我地，話「your look-7 friend came back already」。都好，慳番個西瓜。但係就由於燒賣拖慢咗行程，個船家變得唔多「老黎」，架大飛回程嗰陣飛得仲快過朝早！有幾吓直情好似飛咗上二樓躂落嚟咁款！結果十零分鐘就番到碼頭，你話幾恐怖呢…… 到岸之後（真係要拍手掌），唔駛講又係坐車番酒店。總括嚟講個tour真係幾好玩，Maya Bay更加比想像中完美。

番到酒店沖個涼，之後就落patong beach醫肚。由於喪失了太多能源，今餐一致同意食至為飽肚既意大利菜。搵咗間門面唔錯既餐廳，不過d野無想像中好食，尤其個pizza竟然無第一日喺商場foodcourt嗰個咁好食（怒）~~不過埋單都唔駛二千珠，算啦。

食完之後大伙決定短暫分道揚鑣，女既去shopping，男既去做「麥沙豬」；為咗避開琴日經過嗰條「水圍路」，三個男仔就去咗一條叫bang la road既街度行，嗰度夜晚係patong beach最熱鬧既地方，勁多吧女同人妖，男性遊客行過例必過嚟兜生意，本來都無乜野（只要唔係人妖），衰在有d女你唔理佢，佢竟然走嚟「meet」你手臂，monchowchow就慘中幾野……

兜兜轉轉行咗好耐，三丁友又行過book tour嗰間agent，貌似火柴人既姐仔見到我哋就揮手叫我哋入去，問我哋今日好唔好玩之類，我哋就問吓樓上「麥沙豬」既詳情。姐仔介紹我哋做咩盧薈按摩，話曬完太陽做啱哂喎，見一粒鐘先500珠咁平，就試試啦。

本來做「麥沙豬」無咩好講，之但係竟然發生咗攪笑野。第一單就係洗腳既時候，一個滿面豆皮既「欣宜」走出來幫monchowchow洗腳，monchowchow一時都不以為然，只是後來先知個「欣宜」就係做按摩既技師！為免傷人自尊，monchowchow既刻落樓同姐仔婉言換人（其實咁都係衰架喇，不過再衰既還在後面……）

按摩嗰陣夢幻左同monchowchow係喺同一個帳幕，而燒賣就喺另一邊。按摩過程都幾舒服，一個鐘話咁快就過。當夢幻左同monchowchow一出去，就見到燒賣坐喺度等，仲十足十等咗好耐咁款，加上事後燒賣聲稱唔見咗500港元，就更令人思疑佢唔知攪咗d咩古怪野……而更抵死既，就係嗰個「欣宜」原來之後轉咗俾燒賣，結果俾燒賣再change一次。可憐「欣宜」一晚之內竟受兩次打擊，唉！真係…… （不過我估佢都慣哂架喇）

按完之後三個女仔又咁啱嚟到，佢哋又係嚟做「麥沙豬」。於是男生們又走咗去bang la road兜咗陣，一路飲酒一路等齊人返酒店。

返到酒店已經一點，之後火柴人同夢幻左就無出現過，其餘人等就玩啤牌玩到成五點先散。當monchowchow想瞓既時候，carman打電話過嚟話好精神不如去游水喎，monchowchow半聲不響，將d無聊電話交咗俾燒賣來應付就去瞓死了。

清早起床出發，難得有大家都表現精神（燒賣除外）

單是一個Maya Bay，已經令布吉之旅值回票價

美景之前大合照，請將注意力放在照片的上半部份……

Maya Bay上模仿「泰國沖」pose

大飛駛向山邊餵馬騮，d馬騮得意過城門水塘嗰d好多

pp島市集既海邊，幾乎全部旅行團都會嚟呢樹食飯

由於實在好多魚，所以就算只係浮潛已經好有海底感覺

千層麵味道尚可，估唔到去布吉竟然會食三餐pizza！

晚上的bang la road非常熱鬧

呢間就係我哋做「麥沙豬」既架步，亦係燒賣唔見咗500蚊既地方……

下集大結局……！

十年jackass布吉之旅（1）-- monchowchow

2007-09-28T20:52:00.000+08:00

相識十載，千呼萬喚既Jackass團體遊終於喺今年攪得成，感動感動再感動。雖然唔齊人，但總算是大多數人啦……

至於今次旅行去邊樹，提議多多，最後選擇咗泰國布吉，貪佢陽光與海灘，成班人唔會走散得去邊（妳走啦，走去嗰邊摸蜆啦！）。不過無傳聞中咁平，4日3夜package都要成3千幾，港元弱成咁，你話布殊係咪邪惡？

另外，點都要講下今次既團友：火柴人、+2、Carman、夢幻左、燒賣 & monchowchow……乜咁啱又係當年七星岩之旅嗰六條原班人馬！？可見呢六條友真係好X貪玩，而且都係公司冗員，完全唔會好忙請唔到假嗰隻。

望穿秋水到咗出發當日，無人遲到、無人帶漏passport、泰東無delay，真係還得神落。喺機場買咗兩樽Chivas，諗住之後幾晚喺布吉吹哂佢……

泰東既機真係見面勝聞名：殘、舊、臭。飛機餐係三文治（噢多謝我好飽~~），而最攪野就係架機機身寫住one-two-go，而之後無耐喺布吉炒咗嗰架，亦都係one-two-go……
坐咗3個鐘機就到達布吉，泰東無樣好，就係時間一流，到步先係十點幾。天氣幾好唔算熱，喺機場兌好錢，搵咗架七人van去酒店，900珠一程，殺佢啦。

大約40分鐘車程，終於到達我地既酒店Blue Marine Resort，好多網友都介紹過，服務同環境都算唔錯，房間都ok大。放低行李拿拿林就坐酒店既shuttle bus 落patong beach。五分鐘車程，落到patong beach剛過一點，嗰度係布吉最熱鬧既地區，海灘後面成街都係商店、餐廳同酒吧。

因為無食冷凍三文治，所以最首要還是醫肚。隨意搵咗間泰國餐廳坐低，d野賣相還可但唔算好食。食完就去book去pp島既day tour先，沿住patong beach一路都有好多旅遊agent，我地就呢間問吓嗰間問吓，前提就係個tour要包maya bay（睇過《迷幻沙灘》既人點可以唔去？）

幾經波折，喺一間agent book咗，每人1400珠（應該可以再平一兩百珠，不過少少錢由佢）由於飲酒飲到好急，問agent 姐姐（佢個樣有d似火柴人）借廁所，佢就帶咗我地上樓上，原來上面係做「麥沙豬」既架步黎，環境都算乾淨咁喎，問吓價，泰式每個鐘300珠，唔，等我記低佢先……

攪掂咗正事，緊係衝去沙灘玩啦，點知一到沙灘就落雨，仲係落狗屎嗰隻。由於大家都唔再係十八廿二既年少輕狂，就唯有搵個地方避雨再講啦（so sad）。入咗後街的一個商場foodcourt，又食過！食咗個小號pizza濕濕碎，最大鑊係一人一杯大雪糕，因為好甜，飽到有點想嘔~~

食完野d雨就停咗，我哋又出去左兜右兜。沿街好鬼多做按摩既舖頭，d技師就坐哂出嚟喺度「麥沙麥沙」咁叫。我咃諗住轉番出沙灘，見路就行，點知行行吓好似入咗深圳水圍咁款既地方（不過查實我哋都未去過水圍），好彩有三個女仔喺度，如果唔係我估都幾麻煩……

終於兜翻出patong beach，好大浪，有人喺度玩降傘。我哋無帶泳衣，喺岸邊玩玩水，影吓相。之後就坐車返酒店去泳池游水，玩到好鬼攰…… 夜晚又落翻patong beach食飯。去咗旅遊小冊上有賣廣告既savoey食飯，有個識中文既待應招呼我哋揀海鮮，價錢貴少少，但味道就相當唔錯。

食完無耐就翻酒店，玩吓十五二十飲吓酒，成三點幾先瞓，聽日晨早仲要去pp島，雖然唔似以前喺hall會玩通宵，不過都算叫做執翻幾分昔日既風采架喇！

出發前大合照：又是當年六丁友

就係呢樽chivas，好衰唔衰兩樽裝連個核突旅行袋，兩手空空既monchowchow就唯有捱義氣啦，真係慘！

有相為証，真係one-two-go呀！

酒店房，都算乾淨光猛

酒店座落山腰，估記海嘯都冚唔到上嚟

呢架就係酒店既shuttle bus，令我諗起《精裝追女仔》

午餐係打後咁多餐之中最正宗既泰國菜，味道麻麻，埋單仲要千幾珠

左圖：布吉好多便利店，燒賣同夢幻左話既然黎布吉就要放縱吓，於是一路行一路攞住支啤酒黎飲，飲完一支又一支右圖：紅色既「督督」係布吉最主要既交通工具，由我地酒店去patong beach每程200珠

商場foodcourt既pizza估唔到咁好食，但雪糕就太甜喇

patong beach好大浪，泳術差d隨時被捲走

savoey就喺patong beach後一條街，好大間，d海鮮鋪哂出嚟俾客揀

人在異邦，為十年友情飲杯！

未完待續……！

Oliver's Wedding -- monchowchow

2007-09-25T02:28:00.000+08:00

遊記未出，婚禮相先到。

Trip名徵求 - 夢幻之左

2007-08-20T14:44:00.000+08:00

適逢幾年一度大旅行會於30號出發, 為隆重其事, 現徵求團名一個.
希望大家可以提供一下.

九月預告--monchowchow

2007-07-25T01:09:00.000+08:00

未去Maya bay，先睇套《迷幻沙灘》頂頂癮。唉，如果我地個團有個Virginie Ledoyen你話幾好呢……

o既然出開post, 回味一下...3 - 燒賣

2007-07-09T14:10:00.000+08:00

天空蹴心拳~~~!!!

o既然出開post, 回味一下...2 - 燒賣

2007-07-09T14:07:00.000+08:00

我無必要講個名你聽~~~!!!!!

o既然出開post, 回味一下...1 - 燒賣

2007-07-09T14:04:00.000+08:00

無敵鐵甲人~~~~!!!!!!!!!!!!!

天空蹴心拳! - 燒賣

2007-07-09T12:06:00.000+08:00

每當阿龍需要幫果陣，狼頭劍就會發出萬丈光芒。佢會越過時空，當阿龍同機械人合體之後，就會變成劍龍。狼頭劍吸收地上所有o既能量，就產生無窮o既力量，劍龍就成為無敵鐵甲人

七一恭喜 -- Monchowchow

2007-06-30T21:18:00.000+08:00

因為十年，我們忙著回顧，忙著檢討，忙著攪show慶祝，忙著飲茶灌酒……
某某公司五月喬遷之喜，說要同慶七一；
某某社團九月辦個比賽，也要參上回歸；
所以話，我呢排返工忙到跳舞卻依然食得瞓得，實在也是多得這個「十年」之恩賜。

朋友「忍」十年來沒拍拖，一來就話要結婚擺酒。而且好揀唔揀，七一恭候。
我作為他多年來嘅無謂朋友，沒空去飲，也沒什麼可以送禮。
唯有以這篇拙文，送上代表全城寡人的祝福：
恭喜恭喜！

太隱 - 位位六十係咁多 - 燒賣

2007-05-28T09:51:00.000+08:00

飲勝！-- Monchowchow

2007-05-25T02:13:00.001+08:00

近年少見的人齊晚聚 - +2

2007-05-25T02:01:00.000+08:00

係冇當事人同意之下upload呢張晚後相
是但啦
大家咪仲幾靚仔靚女~

至於之後既狂野bar相
我怕有人俾人打，更怕自己俾人打
所以..嗯...

此文經有心人燒賣善意修改

有人結婚，轉載一篇好文 -- monchowchow

2007-05-22T19:52:00.000+08:00

每個男人一開始都是專情的
作者：不詳

每個人一開始都是專情的。

10歲以前，就不說了，無非是淘氣和不懂事。

13、4歲的時候，開始對女孩有好感，但是那時候他離女孩遠遠的，並且以討厭女孩自居，生怕被同伴嘲笑。

15歲的時候，聽到大人們說某某男人好花，把女朋友甩了，女孩自殺了。他覺得這人真狠毒，自己將來一定要做個痴情的男人，一定要一生只愛一個人。

16歲的時候，他喜歡上了一個女孩，但是他不敢和她說。仍然和往常一樣，髒兮兮的在灰土飛揚的操場上踢球。只在女孩走出校門的時候，躲在二樓的窗戶上看她的背影，他覺得她一定是個天使。

17歲的時候，有個女孩喜歡上了他，但是他離她很遠，他心裡面只有自己愛的那個女孩，他覺得看別的女孩都是對她的不忠。

18歲的時候，看了一個MTV，感動得想哭，他想，如果自己的女孩失去了雙眼，他一定會像男主角會毫不猶豫的把自己的眼睛給她，讓她能看到光明。

19歲的時候，高考了。終於和自己暗戀的女孩分別，坐火車去學校的時候，感覺自己離她越來越遠，心像被掏空了一樣。還在想自己一定不會忘記她，等到自己成功以後一定要去找她。

20歲的時候，聽到有人講黃色笑話，覺得這人真可恥。

21歲的時候，她的回信中告訴他，自己有了男朋友。偷偷的哭了一個晚上。

22歲的時候，他向一個女孩表白，女孩說「你是個好人，可是我還小。」他想，我的確是個好人，他說「沒關係，我可以等你。」心想「我不會像那些花心的人一樣，三年五年我也能等。」

23歲的時候，說自己還小的女孩和一個帥哥戀愛了。他很納悶，長大原來可以這樣快。

24歲的時候，他又向一個女孩表白，女孩說「你是個好人，可是我並不適合你。他納悶很久，我是好人妳怎麼還不適合我呢？

25歲的時候，他又追求一個女孩，女孩接受了他。他開始很幸福的為未來拼搏，他想「一時的開心只是暫時的，只有努力拼搏，他和她才能有快樂的未來。」但是，半年以後，女孩和他分手了。只是因為另外一個男孩會說讓她開心的話。女孩說「你是個好人，是我對不起你。」他似乎明白問題所在，他是個好人。

26歲的時候，他開始墮落，交網友。打扮得時尚而酷，而且漸漸的學習著討好女孩的話。不久，他有了個女朋友，雖然他對她也很好，可是，他心裡知道，自己並不愛她。

27歲的時候，他和女孩分手了。他對女孩說「你是個好女孩，是我對不起你。」

28歲的時候，他嘗試了一夜情，發現別人能做的，自己也一樣。

29歲的時候，他學會了講黃色笑話，並且以看旁邊的女孩子臉紅為樂趣。

30歲的時候，他忽然發現自己變得很有能力追求到女孩，但是卻沒有了愛的能力。

於是他在自己的blog中寫下了如下的話：

其實每個男孩，本來都是想做一個感情專一的好男人的。
其實每個男孩，本來看女孩子都是看臉而不是胸部的。
其實每個男孩，本來都是不會講黃色笑話的。
其實每個男孩，本來都是渴望愛一個人直到永遠的。
只是，沒有任何女孩愛這樣的男孩，她們覺得這樣的男孩太幼稚，太古板，沒有情趣。
於是男孩開始改變，變成女孩喜歡的那種。
嘴角掛著壞壞的笑。
玩世不恭或者幽默。
開始學會說甜言蜜語而不是心裡想說的話。
開始學會假裝關心。
學會給女孩送小飾物討好她。
學會如何追求，如何把握愛情。
或者看破紅塵，遊戲情場，成為女人很恨的那種男人。
他們可以很容易俘獲女孩子的心。
但是他們也會在黑的夜裡叼著煙流淚。
心裡有愛的時候，沒有女孩；
有了女孩，卻永遠沒有了愛的感覺。
在聽到女人抱怨世上沒有一個好男人的時候，他們不會再去努力做個好男人，只是微笑著擦肩而過。

恭喜 - 燒賣

2007-05-16T00:36:00.000+08:00

但嚇窒左

下次早d講唔該，我心血少唔嚇得好多次......

唉...
講完

轉左呢度個login name - 燒賣

2007-04-16T09:39:00.000+08:00

諸位 (其實得周周, 維加特, 同我吧...)

因為 google 要整合返 blogger d account, 宜家 login 一律要用 google account, 所以以前southarrow 個 login 已經唔可以再用, 我今朝又得閒, 就將佢轉左啦~~

宜家用我之前開黎 share 野個 gmail account 度, 如下:
login: hallasharing
password: 我房no.+懞周周房no.+ jaryee房no.

唔記得 d 房no.就打電話問下當時人啦, 順便可以聯絡聯絡~~

創意戲名(from forum) - 燒賣

2007-02-08T17:11:00.000+08:00

安全移徐下體
忍者龜頭很大
萬佛潮吹
懲教處女職員
四條女點夠隊
降脂鍊金術師
不明飛行下體
聖鬥士勾踐
賓離套
豐波裡的架妹
鑽石含鳩軟
華人永遠唔長
條利涼親

NBA LIVE 2007 - 迪克曼

2006-12-30T11:53:00.000+08:00

nba 2007 真係幾好玩
幾經辛苦先可以用到DREAM TEAM I

Merry Xmas

2006-12-25T01:34:00.000+08:00

近年過的最熱鬧的平安夜
今年與中學同學在黑沙bbq同打排球
最後在快樂過神仙既金都酒店倒數
MERRY CHRISTMAS

苦等四年 --- 維加特‧迪克曼

2006-12-19T00:33:00.000+08:00

又再勾起宿舍生活的懷念

要放的手還是要放

2006-12-06T23:17:00.000+08:00

Gave out Heart
Gave out Man
Gave out Time
Gave out Holiday
Gave out Data
Gave out Relations
Gave out Info.
Gave out authority
Gave out Resource
Gave out Office
Finally, Gave out the Position.

轉貼 - 維加特

2006-11-17T00:07:00.000+08:00

第一式：
人 = 吃飯 + 睡覺 + 工作 + 玩
豬 = 吃飯 + 睡覺
人 = 豬 + 工作 + 玩
人 - 玩 = 豬 + 工作
結論：不會玩的人，等於一隻會工作的豬。

***********************************************
第二式：
男人 = 吃飯 + 睡覺 + 賺錢
女人 = 吃飯 + 睡覺 + 花錢
男人 + 女人 = 吃飯 + 睡覺 + 賺錢 + 吃飯 + 睡覺 + 花錢
因為：賺錢 + 花錢 = 0
所以：男人 + 女人 = （吃飯 + 睡覺） + （吃飯 + 睡覺）
根據上面第一式：豬 = 吃飯 + 睡覺結論：男人 + 女人 = 兩隻豬

又加場...燒賣

2006-11-16T17:43:00.000+08:00

要買o既人去排隊啦,唔好去hkticketing.com la,busy到爆

千呼萬喚 - 燒賣

2006-10-30T01:57:00.000+08:00

有個老襯 - from燒賣

2006-10-27T02:34:00.000+08:00

謝西嘉亞爸 - 燒賣

2006-10-17T17:28:00.000+08:00

無咩想講, 早幾日同懞周周講起佢, 純粹想post下Jessica Alba d相.

之前我o向飛機睇 SIN CITY 時已經覺得佢好得了.

其實仲搵到之前呀懞周周話綠色see through dress d 相, 但知呢度可唔可以post...

羅渣先生

2006-09-25T10:13:00.000+08:00

羅渣先生你就唔arm啦
黎到澳門都唔打個電話比我
仲要掛住同女朋友傾計攪到我係巴士到好似傻仔咁叫你都聽唔到

p.s. 金龍好住嗎

AGE TRIP 4

2006-09-16T13:11:00.000+08:00

AGE TRIP 3

2006-09-16T13:05:00.000+08:00

AGE TRIP 2

2006-09-16T13:01:00.000+08:00

AGE TRIP

2006-09-16T11:12:00.000+08:00

真係出左... - 燒賣

2006-08-18T14:09:00.000+08:00

尋日行信和, 見到有本新書叫 "文明書房大全" (類似o既名)...

你地快d買本睇下有無講咩叫做 "大威陣八連制霸" 啦......

終於…… -- Monchowchow

2006-08-12T05:37:00.000+08:00

我回來了。見YAN GOSSIP。

我結婚啦!!! --- 櫻木花道

2006-07-18T14:07:00.000+08:00

我宣佈本人將會在今年10月14日(星期六)於尖沙咀文化中心婚姻註冊署舉行婚禮(娶老婆)。在不久的將來, 各位朋友將會收到請柬(不是炸彈)邀請大家來觀禮, 我想大家到時都會識做o架啦(講笑)!!!

唔係咩新鮮事 - 燒賣

2006-07-12T10:09:00.000+08:00

雖然呢樹無乜人黎睇,但我都想借呢度個platform update一下自己近排的狀況:
1.我搬左屋(應該好多人都知)
2.我轉左工(應該無乜人知)

1.已經係半年前o既事,因為我懶的緣故,裝修買傢俬等等攪左好耐.其實宜家都未買晒傢俬同家電.我只係靠我部電腦同tv card過活,得閒就煮下飯食咁,粗茶淡飯好又一餐唔好又一餐(一人份真係好難買餸).因為搬左出黎住,令我發現$10shop同日本城都係好可愛o既地方,我試過响吉之佬$10shop行左個幾鐘.真係樂趣無窮.

2.係呢一兩個星期o既事,因為一來想轉下環境,我已經厭倦面對d pk客同其他department某d低能同事,二來係人工遠低於市場,工作量同收入唔係正比例增長,我開始支持唔到自己o既生活.雖然我已經盡量蛇王意圖補鑊,但都係無補於事.公司有挽留我呢d人才,但我去意已決,唔會望返轉頭.二公子見狀,响痛失人才o既悲痛之下,就將電盈賣左...而我就由九龍o既高尚住宅區搬左去港島o既高尚住宅區返工.因為要過海,我每日o既睡眠時被逼減少了...15分鐘

我唔知大家近排樣,不如都响樹update下啦!我所知o既係
1.懞周周好似又返工了?
2.carman轉工了
3.櫻木花道後半年有大事發生
4.羅楂斷背(我老作的,但我有理由懷疑)

軟硬再加場...好好好 - 燒賣

2006-07-08T09:28:00.000+08:00

分乜鬼兩次加場,根本係有心攪到個個都撲飛咁...
我完本係尾場o既飛...唔再係尾了...

本版好似摺左 -- 維加特

2006-07-05T14:30:00.000+08:00

點解個個都梢失晒呢
唔好只係掛住睇波,德閒POST下啦
阿老wilson仲勁, 打幾次電話都找唔到人,

今年因為受到周圍人仕的影響, 學人買波
截至今日為止共輸左900大元, 都係玩下咁啦

最慘通既都係本週
決賽週未開始前見巴西, 英格蘭, 阿根廷同德國總冠軍都賠超過六倍，
諗往買晒佢地同同事湊下熱鬧, 順便羅少少彩
點知.......唉.....
今年通勝話龍年犯太歲, 真係無錯

依稀記得某年NBA總決賽
當老WIL同安迪生正在電視機前駁個你死我活
我郤挨在一旁嘆息: 對我來說今年早就結束了

玩 LEGO 就要好似玩到佢咁... - 燒賣

2006-06-13T22:33:00.000+08:00

http://www.brickshelf.com/cgi-bin/gallery.cgi?f=126969

無話可說了...

Halloween in 1997 - 夢幻之左

2006-05-25T14:09:00.000+08:00

金光閃閃多美麗 - 燒賣

2006-05-09T01:09:00.000+08:00

超合金魂 GX-32

好似真係幾正, 睇完實物再決定買唔買~~

迪克曼…… -- Monchowchow

2006-04-24T23:32:00.000+08:00

繼《大丈夫》後，我再一次錯信了你，從上圖可知，那真不是一般憤恨……

失戀排行榜

2006-04-05T16:36:00.000+08:00

感謝七頭老公(典自瑮律無窮)的推薦
還誠意權權的做左隻翻版比我
一看即知點解七公會一見鐘情
也明白七頭何以被迷得如痴如醉
祝兩位繼續get. get.. get..it onnnnnnn.....

執念, 既驕且卑, 堅守自己私有的無人可及的洞穴
本來就是每個人都有的本性老生常談
對異性亦然對世界亦然
分別只在於程度上
長不大, 不夠成熟, 只是對生活妥協的人給異類的一種五十步笑百步Labeling.

講番劇情其實都好簡單
就係講一個次次衰左都唔知自已衰乜的失戀王檢討過程
(.... ....令我想起d野..... ....)

最攪笑個part係分左居的女友番黎執野話佢聽仲未同新男友上過床
主角即刻開心到走去one night stand 慶祝下

最喜歡是主角會為女朋友(也有想溝的對象)錄一張合輯, 認為係一種藝術
想起曾幾何時自己也做過公仔, 摩天輪, 相簿, flash, webpage...... ......... ...
(某人仲犀利到做手辦同做衫tim(佢話係wor))

最可惜的是今天才看到這片子
如果在宿舍看的話一定更爽

My Blog - 夢幻之左

2006-04-01T11:15:00.000+08:00

My Blog, pls visit if u r nothing to do!

Happy Fool's Day!

http://spaces.msn.com/imjanc/

又一正歌 "一支槍" - 燒賣

2006-03-31T23:42:00.000+08:00

自己去hallasharing@gmail.com download
請慢用~~
我強烈要求用呢隻歌做懞周周套 2036靈芝苞子o既主提曲!!!!!!!!!!!!!!!!!!

萬眾期待 - 天蠶變 - 燒賣

2006-03-22T00:43:00.000+08:00

我開左個 gmail account, 叫 hallasharing, pwd 係我房no.+懞周周房no.+女新人房no.
我之後會再upload d相上去, 請慢用~~囧

令人放鬆的一個遊戲一段片 -- Monchowchow

2006-03-17T23:26:00.000+08:00

一個遊戲，一段短片。一定要玩完遊戲先好睇片，否則無效果！(記住要開喇叭聽音樂效果)

Gathering of Ka Yee's marriage - 夢幻之左

2006-03-13T16:49:00.000+08:00

Bated photos - Gathering of Ka Yee's marriage

活在貧窮線下 - 燒賣

2006-03-11T11:14:00.000+08:00

我好窮, 我個今個月單野我要跟澳門公價辦事

欽此

有關 A 座「網絡歌曲」--- 櫻木花道

2006-02-09T23:07:00.002+08:00

有冇人有 A 座F Zone那隻「天蠶變」及「越問越傷心」既Copy?我想愛番, 請send給我。Thanks!

給矇周周 - 燒賣

2006-02-06T16:10:00.000+08:00

年初三收到矇周周來電, 以為佢約我打牌比比d錢我洗, 原來係打黎問鴻興出品隻黃金俠超合金.

貼張offical黃金俠超合金魂預覽圖過你睇啦. 唔知係咪要就個可動性, 我覺得個比例怪怪地...

恭賀新禧 - 維加特

2006-01-31T16:22:00.000+08:00

恭喜恭喜恭喜大家發財
初三的辦公室依然淡靜, 今年戰績可謂一落千丈, 今日收市三日共收得紅包三千元
唔講咁多同大家拜個年先
首先祝燒賣兄早日唔洗做
再祝左兄同柴姐有個夢幻婚禮
A先生早日拉埋天窗 Q姐化粧品用極用唔完
加二媽添條龍仔 ... 係勒. 利是我會自動係人情到扣唔洗比我勒多謝晒
羅渣兄紅運當頭唔再青BB
馬交雯覓得如意郎君
操你姐中六合彩+唔會老+唔駛做+食極唔肥 mmm.....m...mmm...
最後祝版主老WIL本漫畫快d出到細呀唔該

New Year Dinner Snap -- 夢幻之左

2006-01-06T16:00:00.000+08:00

攝於一月二日!

Happy New Year --- 迪克曼-V-Garden

2006-01-01T00:49:00.000+08:00

各為大大新年快樂!!!
今年有什麼新年願望呢講黎聽下啦

Jackass年度聚會記錄之有人結婚了！——Monchowchow

2005-11-27T05:59:00.000+08:00

11月26日晚上終有人相約大伙聚餐，感動感動。無奈本blog的中堅份子燒賣與迪克曼兄皆因事無法出現，連帶與兩人甚為有緣的櫻木花道也因為「要陪女朋友買電話」此等理由而缺席，真是…唉！

晚飯是因為遷就某人腿傷之「Carman宴」，沒有牛肉、海鮮、雞蛋和豆腐… 唯有新任電車男蝗蟲不停要點這個那個，弄致最終大量食物浪費之局面，真真可恥！

然後飲野時段KY宣佈結婚消息(！)，我們不禁要關心起電車男的出路… CQ馬上介紹其口中靚女但只有4呎身高的朋友… 唯有懞周周冷靜勸說他不要上當… KY想邀請男生們作「鄧村石」(好奇怪？…)，明年3月中正是良晨吉日也。

席間大伙兒提到相約去旅行事宜，明年345月左右約3-5天的行程，可能是泰國，又或是遊輪旅行，既然大家有興趣也不妨攪攪… 只是仍太遙遠，還是先說好1月1日在懞周周家中打邊爐，只是回家後懞周周發覺還是2號較好…無論如何大家醒目的請定假唔該，否則都無謂再諗太長遠既事…

最後說說，對於「第一位新人唔俾人情」呢件事，女生們都扮哂失憶，真係情何以堪呢…！

十一月-- Monchowchow

2005-11-14T10:41:00.000+08:00

十一月，天氣還不見清涼，歐遊時朝思暮想的牛腩河依然未有機會吃到…
早陣子收到些朋友的留言，好想回，卻未行動。整理歐遊照片時，順手翻閱大學時的相薄，許許多多的記憶和感情又湧上心頭…見入學不久的王旅旅自許嶺南big fan，很感觸，更懷念起那段寶貴的歲月。《魔戒Ｉ》中女王的一句旁白叫人唏噓：那些日子，已經一去不返了…
或者穿了是淺白，大家不忙，也有心，只是軀體已經太習慣由緣份擺佈，如此而已。我也經常為自己設一個期限：完成了自己的作品，然後找老師，找大伙兒去…實情是多舊魚…　
肺腑之言，不一定要唱Ｋ、ＢＢＱ、打牌…　我的好朋友，讓我見一見就快樂。
十一月，迎來自己的生日。不求什麼，但望能夠用完成品，為自己慶祝。

係自己摺埋自己先ARM --------迪克曼

2005-10-30T18:25:00.000+08:00

首先向大家報告一下我生日的一天先
一早起身眼睛有點腫因為前一個晚給蚊子釘一晚
但不論如何還是如常的上班
下班之後就跟家人一起吃日本野
為左獎勵自己用分期買左部O2 MINI
回到家裡還不到十點半靜靜的坐下看一看原來只收到兩個祝賀短訊
一個是前女友的一個是前前女友的
發了一下呆才驚覺不是別人主動忘記你
是自摺埋自己太久了之故吧

呢度可以摺埋了... - 燒賣

2005-10-07T10:37:00.000+08:00

呢幾日可以買完d野返黎即開即玩,感覺確係爽~~除左左圖的figure, 仲有SIC28 - 用手提變身的幪面超人555, 都係上品

我見得閒都係咁二貼下相, 呢個post都唔會有咩人睇/回了, 我估呢度離摺埋之期不遠

記得迪土尼 -- Monchowchow

2005-09-05T13:36:00.000+08:00

見到幾萬人迫爆迪土尼的場面，不禁懷念起當年暢玩東京迪土尼。那天剛巧是旁邊迪土尼海洋的開幕翌日，分薄了人潮，所以玩得特別舒服，我同BJ Li一朝早去到，在地圖上mark低想玩的地方然後順時針去玩，結果一天內悠悠閒地玩了全園80%以上的設施，BJ Li更買嘢買到唔想走… 如果當晚在地下鐵有取走中田英壽的海報，那就更完美了！

看旅遊書說法國迪土尼有四份一個巴黎咁大，我睇到眼都凸——吹水吧？我印象中好細好唔掂架wow。將來無論如何我都唔會再去，有時間我不如去龐比度散散步好過。

忽然記起多年前到橫濱八景島，本身倦極（前一晚通宵由新宿走到銀座築地！），見到高達100米的跳樓機時就難免雙腿發軟，正當猶豫是否去玩的時候，在場的燒賣兄率先棄權：醫生話人一世只可以玩3次跳樓機，我已經玩了兩次，所以今日唔玩得了…

beer party - 燒賣

2005-09-01T14:51:00.000+08:00

上星期六bbq, 因為呢件盛事大夥兒駕車前往馬拉買左上圖違禁品回來(字母女星王國係無酒賣的), 實行"飲一鑊更快樂". 當晚 bbq 都好多野食, 較出色的有燒魔鬼魚同尤魚(唔知點解的尤魚好似同香港的唔同, 呢度好食好多). 到bbq完見仲有大量啤酒未飲晒(我地呢度d人飲酒個個成支成支咁去, 絕對唔似我香港某位王姓屬養金魚族的hall友), 就成個ice box運返酒店度繼續玩game. 玩開口中, 有成支上, 有vodka lime, 更有 vodka + beer, 總之一樂也, 但求清貨. 玩到咁上下, 有人酒後吐真言, 盡爆工作上的不滿, 有人飲到訓左落地, 有人唔理三七廿一三唔識七同人同床共寢的(兩個男的).

回想上一次痛飲已經係之前住 hall 的時候, 而某君的飲後痛嘔照至今仍在我家的 pc 內(可憐的桌子...). 之後, 有人借尿遁, 有人轉飲可樂, 有人依然養魚. 但, 總之, 此情不再.

歐洲行 -- Monchowchow

2005-08-24T12:29:00.000+08:00

喂喂喂，我９月尾（25號左右）會去法國同西班牙，全程12-16天，你地邊個有興趣 join呀？９月飛巴黎機票五千樓下，巴黎住宿在我舊波士個妹度（免費Yeah!)如果選擇只玩巴黎既話，住四五天全程埋單只須七千左右，有興趣 call我！

ABCDEFG - 燒賣

2005-08-22T22:16:00.000+08:00

由於工作關係，要到字母女星王國一個月。由第一日落地完全唔知發生啥事，到今日已完全投入工作，轉眼已經兩星期，人也漸習慣這裡的步伐(這是不希望見到的...)。短短兩星期，已全遊遍字母女星王國值得一到的地方。距我回港的日子，可以進入最後倒數(但唔等於唔使再飛返來...)。詳情請留意稍後"小馬士多"詳細報導。

8月16日清晨我感到一點點肚餓 -- Monchowchow

2005-08-16T09:06:00.000+08:00

昨晚一邊起稿一邊翻聽港台節目《給電影的情書》，呢種關於電影的老人院式節目，唔駛講monchowchow都會聽得幾enjoy，之不過有時卻真會給那兩位成日唔記得呢樣嗰樣的主持人激死，例如男的那位主持會一邊稱呼妮歌潔曼為自己的女神，卻不知道妮歌有演出過Batman，然後知道的那位女主持又唔記得那齣Batman的男主角係邊個（Monchowchow怒叫:係韋基馬）、對《死亡習作》嘅劇情複述又不正確等等，當然最火的就是十居其九既疑問monchowchow都知道答案！唯一唔怪佢地既，就係佢地唔記得苗橋偉齣《楚留香》中邊個演「中原一點紅」，這個monchowchow也不敢肯定——只能大概90%相信，是惠天賜，亦即係電視劇《武林聖火令》的男主角。

不過monchowchow偶然間都會記錯，例如早排Li問他新精武門的續集叫咩名，欣賞周星馳的monchowchow居然答錯，正確名稱是《漫畫威龍》，而他的答案係《電角神拳》(這是電影中蕭芳芳教周星馳既武功)，字面上差錯十萬八千里，真的失威。

最近因為好多說不出的原因，攪到向仁完全無辦法寫blog，有時想到要寫些什麼什麼，一會兒間勁兒就失掉了，現在敲敲鍵盤，只是想跟大家說聲：monchowchow還健在，但向仁就半死了…

(最後介紹一個幾出名又幾好笑既Blog俾大家——香港有個王旅旅，小女生文章有趣，原本一心想入BU中文系，最新消息係因為入了嶺大中文系而哭爆雙眼中，有空不妨前往探病一下）

老豆有難…　-- Monchowchow

2005-08-07T18:02:00.000+08:00

今天看到新聞，說老豆（圖片正中者）嗰間全港至得的城ｘ桑拿執笠了…老豆涉嫌刑事罪行，正被警方冷結戶口…
而最前面兩名手執招財道具的兩名員工（白粉誠＆流精華）則慘被拖欠薪金，現正艱難渡日中…

肥牛牛布斯 - 燒賣

2005-07-29T01:19:00.000+08:00

走的走，留的留 - 燒賣

2005-07-17T23:21:00.000+08:00

前日又收到有同事會離開公司的消息，已經係圍內第x位幸運兒了。同期入公司的人，少了又少。飯腳由當初一圍酒席，變左茶餐廳卡位。
自己友有好路數是值得高興的。但知道一齊搏殺的人又少一個，心裡真的不是味兒。

坐著愁都不是辦法，唯有跟大隊去也~~~

Postsecret -- 蘭‧迪克曼

2005-07-17T10:33:00.000+08:00

這個blog是在"律栗無窮"中看到的
原來這貼子應該是要post在律栗無窮的blog中的
但又怕不請自來，阻住人地打情罵悄，所以都係放係呢到
http://chauli.blogspot.com/2005/06/cool-blog.html

你可以將自己的秘密呈現在一張postcard中，寄比網主，他就會刊登出來
這個blog的慨念其實並不新鮮, 王先生早就大徹大悟地發表過一封呼籲大家坦蕩蕩做人的電郵
(對勒, 王先生你做乜唔post個封email係呢個blog到呢)
一邊看這個blog一邊感觸
我對窺探別人的私隱沒有興趣
但看這個blog, 就正如其critique一樣 - 讓你知道你不是唯一

香港人曾做過的56樣無聊事 - 燒賣

2005-07-12T23:49:00.000+08:00

14, 18, 23, 24, 37, 41, 49, 56我真係無做過
18 - 我未見過有得執
23 - 我 d 鄰居唔會放出門口
24 - 我屋無呢樣野
56 - 搵自己笨的行為
尤其係 41, 都唔知有無好玩, 仲要有 d 人咁大個人都仲玩...

1.玩米缸，將手插入米缸裡面o既米裡面篤下篤下。
2.在百貨公司入面篤扶手電梯旁的吊牌。
3.地下有階磚時，特登隔一格一格o黎行(不可踩界，要完全在格內)。
4.用錶面反射陽光，照o黎照去。
5.跳樓梯(愈多級愈勁)。
6.行路上高起左地方(例如高起左o既長條型石博，好似玩平衡木咁行法)。
7.鋪張紙在硬幣上面，然後用鉛筆係上面油，油返個形出o黎。
8.食完瑞士糖之後，將糖紙包番個原本四四方方果個形出o黎。
9.超級市場踩住架購物車o黎行。
10.踩水"tum"，係好特登果隻。
11.吹口水波。
12.搣牆上的乳膠漆或牆紙。
13.係平滑o既地面上面"冼"下"冼"下咁行。
14.整濕o的紙巾，掟上學校廁所天花頂。
15.食完綠箭香口膠，一定摺返成張包裝紙，再放返入個大套入面。
16.響課室玩俄羅斯輪盤，將玩粉刷霑滿粉筆粉，放係風扇上面，等個風扇轉轉下，轉得快個時飛出o黎，睇下個粉刷中邊個。
17.放膠袋(當風爭甘放)。
18.去後梯執咸書睇，張睇完的咸書撕開飄落街。
19.貼張龜仔紙嚮o的同學。
20.踩人地個影。
21.狂踩人地對白飯魚，尤其是大肥仔果o的。
22.用幾條橡筋射。
23.掉人地門口的拖鞋落街。
24."蚊"消防喉，射水落下面個球場，睇下射到幾遠。
25.擇水彈。
26.用氣鎗射街上的途人。
27.玩千揪，"fing"到咁上下就飛出去鬥遠。
28.落樓梯時坐係o的扶手上面"sir"落黎。
29.在自動梯行相反方向。
30.把"誤投信件"或沒有用的宣傳單張，胡亂放入其他的住宅信箱。
31.坐地鐵時，抓緊中間的扶手，地鐵一開動博命繞住轉(自轉)。
32.在月台上鬥快跑。
33.帶玩具返學。
34.用圖釘弄穿學校壁佈板。
35.亂按人家的門鐘，然後鬆人。
36.明知過了三歲，仍然不買票，"捐"地鐵的入/出閘機。
37.用改錯水(很舊的有一個掃那種)附送的天拿水，搽在手上。
38.在井字型公屋中間的大天井中放紙飛機，或者放紙青蜒，看看誰放的紙青蜒最慢由廿幾樓落到地面。
39.煲蠟。
40.把汽水罐靜雞雞放在校車的車輪下攝住，開車時把它壓扁。
41.圍閹
42.呵尿時出力射走 D 屎積
43.將紙碎或者紙飛機撒落街
44.將bubble紙氣泡逐粒"鏈"爆
45.o係屋企走廊玩"壁虎功"
46.走到開動緊電風扇面前:"呀~~~~~~~~!"
47.用間尺好似 "搖搖板"咁彈起舊擦膠
48.寶貼當泥膠,用間尺整pizza
49.係屋企撩鼻屎然後抿落牆
50.將 d 擦膠碎用尺切粒粒
51.膠水搽係手/筆盒上 , 等佢乾之後成塊 met 出黎 ~
52.洗手時用手頂住個出水位,用d水去射周圍d人
53.同隔離位鬥快開哂筆盒d機關
54.飛拖鞋
55.特登將飲完的紙包飲品吹脹然後放在地上，大力地踩爆佢
56.用泥膠塞電制/電話插蘇

濟記出品，唔係腸粉 -- Monchowchow

2005-07-08T16:24:00.000+08:00

詳見：http://heungyangossip.blogspot.com/2005/07/blog-post_08.html

傳說中的《翻天復地災難蟲》-- Monchowchow

2005-07-01T23:18:00.000+08:00

詳見http://heungyangossip.blogspot.com/2005/07/blog-post.html

放假 - 燒賣

2005-07-01T00:59:00.000+08:00

公司強制性清假, 難得有幾日人地返工我放假的日子, 可以好優閒咁食下 tea,買下野. 奈何天氣唔係太好, 如果唔係我可能去左郊外撲碟啦...
上圖係今日買的, 好多關節, 好好玩

我最喜愛的11齣愛情電影 -- Monchowchow

2005-06-29T15:29:00.000+08:00

詳見http://heungyangossip.blogspot.com/2005/06/11.html

簡易Post相片方法 --- 櫻木花道

2005-06-28T23:44:00.000+08:00

所有步驟和Post文章一樣, 分別只是在寫文章的方格上有個相片icon, Click了它就可以簡易attach相啦, 請大家試試! (這3張圖就是用上述的方法Upload的)

<<頭文字 D>> - 櫻木花道

2005-06-27T13:49:00.000+08:00

尋日捉左Monchowchow去睇<<頭文字 D>>, 睇完之後除左叫「回水」外都唔知講乜好, 冇比Monchowchow鬧巳經算好彩。講番套戲, D演員o既水準仲差過當年王老Wil套「沖涼骨,全港至得」(到最後我都係唔知o離套爛片叫乜名......請王大導覆)裏面D人, 最好戲個黃秋生剩係識得扮傻仔, 飛車埸面攞鏡角度又唔好, 內容情節亳無特出。全套戲唯一可取o既地方就只有D車, 間豆腐店同油站o既佈景做到同漫畫一模一樣。 2005年港產片開畫票房冠軍都係得咁o既質素, 香港電影o既前途真係......

今日有間叫 macau jockey club 打比我叫我 join member... - 燒賣

2005-06-25T01:44:00.000+08:00

邊個放左我個 mobile 出去? 係咪奧利華條蛋散?

今天世界很美好 -- Monchowchow

2005-06-24T14:01:00.000+08:00

窗外行電閃電落狗屎，我聽不到，只聽到自己心跳和球場木板吱吱聲…
在這橫風橫雨的日子，決定為朋友們獻上一直以來收收埋埋在心底的讚美：

好友流精靈聽明絕頂唔十九、大眼蘇珊青春可人甜組兒、小馬高正義大方、曲髮安風流瀟洒、夢幻左待人親切、搭上行事爽快火柴人，同房鬼馬la-Q魅力四射，手繞醒目姊妹馬交文、肥仔賓也是長袖善舞，終有一日等到失蹤人口KY美人龜；金花三朵中小辣椒出名溫柔、愛猫安誠實有禮、井底獅子內在美爆棚有口皆碑；最後更要感謝溫厚沉實八通堅、口齒伶俐書法超和心地善良變色龍，沒有您們的關照我絕對無法戀上身手敏捷頭腦靈活黃埔之花Bridget Li…

在這橫風橫雨的日子，縱然我涼薄依舊，還是要說聲今天世界很美好！

Mon Lonely 2有得睇啦！-- Monchowchow

2005-06-22T18:29:00.000+08:00

Mon Lonely -2

勁 --- 奧利花‧迪克曼

2005-06-20T14:23:00.000+08:00

http://www.storewars.org/flash/index.html

大災難 -- Monchowchow

2005-06-16T01:41:00.000+08:00

1

如果識著個女朋友係咁，你地會點？

想不到獲得肯定的文章 -- Monchowchow

2005-06-15T00:20:00.000+08:00

（今早又在SINA NBA網寫了一篇文章，寫來帶點個人自傳的氣味，真沒想過得到許多人的認同，也登了在SINA的新聞頁中… 有空就捧場吧！)

簡體版：http://sports.sina.com.cn/nba/ (在熱門評論，夾雜在什麼日報、午報、商報之間)

繁體版：monchowchow's blog（怪獸球評：去吧！橫掃活塞）