Jackass年度聚會記錄 之 有人結婚了！——Monchowchow

11月26日晚上終有人相約大伙聚餐，感動感動。無奈本blog的中堅份子燒賣與迪克曼兄皆因事無法出現，連帶與兩人甚為有緣的櫻木花道也因為「要陪女朋友買電話」此等理由而缺席，真是…唉！

晚飯是因為遷就某人腿傷之「Carman宴」，沒有牛肉、海鮮、雞蛋和豆腐… 唯有新任電車男蝗蟲不停要點這個那個，弄致最終大量食物浪費之局面，真真可恥！

然後飲野時段KY宣佈結婚消息(！)，我們不禁要關心起電車男的出路… CQ馬上介紹其口中靚女但只有4呎身高的朋友… 唯有懞周周冷靜勸說他不要上當… KY想邀請男生們作「鄧村石」(好奇怪？…)，明年3月中正是良晨吉日也。

席間大伙兒提到相約去旅行事宜，明年345月左右約3-5天的行程，可能是泰國，又或是遊輪旅行，既然大家有興趣也不妨攪攪… 只是仍太遙遠，還是先說好1月1日在懞周周家中打邊爐，只是回家後懞周周發覺還是2號較好…無論如何大家醒目的請定假唔該，否則都無謂再諗太長遠既事…

最後說說，對於「第一位新人唔俾人情」呢件事，女生們都扮哂失憶，真係情何以堪呢…！

十一月-- Monchowchow

十一月，天氣還不見清涼，歐遊時朝思暮想的牛腩河依然未有機會吃到…
早陣子收到些朋友的留言，好想回，卻未行動。整理歐遊照片時，順手翻閱大學時的相薄，許許多多的記憶和感情又湧上心頭…見入學不久的王旅旅自許嶺南big fan，很感觸，更懷念起那段寶貴的歲月。《魔戒Ｉ》中女王的一句旁白叫人唏噓：那些日子，已經一去不返了…
或者穿了是淺白，大家不忙，也有心，只是軀體已經太習慣由緣份擺佈，如此而已。我也經常為自己設一個期限：完成了自己的作品，然後找老師，找大伙兒去…實情是多舊魚…　
肺腑之言，不一定要唱Ｋ、ＢＢＱ、打牌…　我的好朋友，讓我見一見就快樂。
十一月，迎來自己的生日。不求什麼，但望能夠用完成品，為自己慶祝。

係自己摺埋自己先ARM --------迪克曼

首先向大家報告一下我生日的一天先
一早起身 眼睛有點腫 因為前一個晚給蚊子釘一晚
但不論如何還是如常的上班
下班之後就跟家人一起吃日本野
為左獎勵自己 用分期買左部O2 MINI
回到家裡還不到十點半 靜靜的坐下 看一看原來只收到兩個祝賀短訊
一個是前女友的 一個是前前女友的
發了一下呆 才驚覺不是別人主動忘記你
是自摺埋自己太久了之故吧

呢度可以摺埋了... - 燒賣

呢幾日可以買完d野返黎即開即玩,感覺確係爽~~除左左圖的figure, 仲有SIC28 - 用手提變身的幪面超人555, 都係上品

我見得閒都係咁二貼下相, 呢個post都唔會有咩人睇/回了, 我估呢度離摺埋之期不遠

記得迪土尼 -- Monchowchow

見到幾萬人迫爆迪土尼的場面，不禁懷念起當年暢玩東京迪土尼。那天剛巧是旁邊迪土尼海洋的開幕翌日，分薄了人潮，所以玩得特別舒服，我同BJ Li一朝早去到，在地圖上mark低想玩的地方然後順時針去玩，結果一天內悠悠閒地玩了全園80%以上的設施，BJ Li更買嘢買到唔想走… 如果當晚在地下鐵有取走中田英壽的海報，那就更完美了！

看旅遊書說法國迪土尼有四份一個巴黎咁大，我睇到眼都凸——吹水吧？我印象中好細好唔掂架wow。將來無論如何我都唔會再去，有時間我不如去龐比度散散步好過。

忽然記起多年前到橫濱八景島，本身倦極（前一晚通宵由新宿走到銀座築地！），見到高達100米的跳樓機時就難免雙腿發軟，正當猶豫是否去玩的時候，在場的燒賣兄率先棄權：醫生話人一世只可以玩3次跳樓機，我已經玩了兩次，所以今日唔玩得了…

beer party - 燒賣

上星期六bbq, 因為呢件盛事大夥兒駕車前往馬拉買左上圖違禁品回來(字母女星王國係無酒賣的), 實行"飲一鑊更快樂". 當晚 bbq 都好多野食, 較出色的有燒魔鬼魚同尤魚(唔知點解的尤魚好似同香港的唔同, 呢度好食好多). 到bbq完見仲有大量啤酒未飲晒(我地呢度d人飲酒個個成支成支咁去, 絕對唔似我香港某位王姓屬養金魚族的hall友), 就成個ice box運返酒店度繼續玩game. 玩開口中, 有成支上, 有vodka lime, 更有 vodka + beer, 總之一樂也, 但求清貨. 玩到咁上下, 有人酒後吐真言, 盡爆工作上的不滿, 有人飲到訓左落地, 有人唔理三七廿一三唔識七同人同床共寢的(兩個男的).

回想上一次痛飲已經係之前住 hall 的時候, 而某君的飲後痛嘔照至今仍在我家的 pc 內(可憐的桌子...). 之後, 有人借尿遁, 有人轉飲可樂, 有人依然養魚. 但, 總之, 此情不再.

歐洲行 -- Monchowchow

喂喂喂，我９月尾（25號左右）會去法國同西班牙，全程12-16天，你地邊個有興趣 join呀？９月飛巴黎機票五千樓下，巴黎住宿在我舊波士個妹度（免費Yeah!)如果選擇只玩巴黎既話，住四五天全程埋單只須七千左右，有興趣 call我！

ABCDEFG - 燒賣

由於工作關係，要到字母女星王國一個月。由第一日落地完全唔知發生啥事，到今日已完全投入工作，轉眼已經兩星期，人也漸習慣這裡的步伐(這是不希望見到的...)。短短兩星期，已全遊遍字母女星王國值得一到的地方。距我回港的日子，可以進入最後倒數(但唔等於唔使再飛返來...)。詳情請留意稍後"小馬士多"詳細報導。

8月16日清晨我感到一點點肚餓 -- Monchowchow

昨晚一邊起稿一邊翻聽港台節目《給電影的情書》，呢種關於電影的老人院式節目，唔駛講monchowchow都會聽得幾enjoy，之不過有時卻真會給那兩位成日唔記得呢樣嗰樣的主持人激死，例如男的那位主持會一邊稱呼妮歌潔曼為自己的女神，卻不知道妮歌有演出過Batman，然後知道的那位女主持又唔記得那齣Batman的男主角係邊個（Monchowchow怒叫:係韋基馬）、對《死亡習作》嘅劇情複述又不正確等等，當然最火的就是十居其九既疑問monchowchow都知道答案！唯一唔怪佢地既，就係佢地唔記得苗橋偉齣《楚留香》中邊個演「中原一點紅」，這個monchowchow也不敢肯定——只能大概90%相信，是惠天賜，亦即係電視劇《武林聖火令》的男主角。

不過monchowchow偶然間都會記錯，例如早排Li問他新精武門的續集叫咩名，欣賞周星馳的monchowchow居然答錯，正確名稱是《漫畫威龍》，而他的答案係《電角神拳》(這是電影中蕭芳芳教周星馳既武功)，字面上差錯十萬八千里，真的失威。

最近因為好多說不出的原因，攪到向仁完全無辦法寫blog，有時想到要寫些什麼什麼，一會兒間勁兒就失掉了，現在敲敲鍵盤，只是想跟大家說聲：monchowchow還健在，但向仁就半死了…

(最後介紹一個幾出名又幾好笑既Blog俾大家——香港有個王旅旅，小女生文章有趣，原本一心想入BU中文系，最新消息係因為入了嶺大中文系而哭爆雙眼中，有空不妨前往探病一下）

老豆有難… -- Monchowchow

今天看到新聞，說老豆（圖片正中者）嗰間全港至得的城ｘ桑拿執笠了…老豆涉嫌刑事罪行，正被警方冷結戶口…
而最前面兩名手執招財道具的兩名員工（白粉誠＆流精華）則慘被拖欠薪金，現正艱難渡日中…

肥牛牛布斯 - 燒賣

走的走，留的留 - 燒賣

前日又收到有同事會離開公司的消息，已經係圍內第x位幸運兒了。同期入公司的人，少了又少。飯腳由當初一圍酒席，變左茶餐廳卡位。
自己友有好路數是值得高興的。但知道一齊搏殺的人又少一個，心裡真的不是味兒。

坐著愁都不是辦法，唯有跟大隊去也~~~

Postsecret -- 蘭‧迪克曼

這個blog是在"律栗無窮"中看到的
原來這貼子應該是要post在律栗無窮的blog中的
但又怕不請自來，阻住人地打情罵悄，所以都係放係呢到
http://chauli.blogspot.com/2005/06/cool-blog.html

你可以將自己的秘密呈現在一張postcard中，寄比網主，他就會刊登出來
這個blog的慨念其實並不新鮮, 王先生早就大徹大悟地發表過一封呼籲大家坦蕩蕩做人的電郵
(對勒, 王先生你做乜唔post個封email係呢個blog到呢)
一邊看這個blog一邊感觸
我對窺探別人的私隱沒有興趣
但看這個blog, 就正如其critique一樣 - 讓你知道你不是唯一

香港人曾做過的56樣無聊事 - 燒賣

14, 18, 23, 24, 37, 41, 49, 56我真係無做過
18 - 我未見過有得執
23 - 我 d 鄰居唔會放出門口
24 - 我屋無呢樣野
56 - 搵自己笨的行為
尤其係 41, 都唔知有無好玩, 仲要有 d 人咁大個人都仲玩...


1.玩米缸，將手插入米缸裡面o既米裡面篤下篤下。
2.在百貨公司入面篤扶手電梯旁的吊牌。
3.地下有階磚時，特登隔一格一格o黎行(不可踩界，要完全在格內)。
4.用錶面反射陽光，照o黎照去。
5.跳樓梯(愈多級愈勁)。
6.行路上高起左地方(例如高起左o既長條型石博，好似玩平衡木咁行法)。
7.鋪張紙在硬幣上面，然後用鉛筆係上面油，油返個形出o黎。
8.食完瑞士糖之後，將糖紙包番個原本四四方方果個形出o黎。
9.超級市場踩住架購物車o黎行。
10.踩水"tum"，係好特登果隻。
11.吹口水波。
12.搣牆上的乳膠漆或牆紙。
13.係平滑o既地面上面"冼"下"冼"下咁行。
14.整濕o的紙巾，掟上學校廁所天花頂。
15.食完綠箭香口膠，一定摺返成張包裝紙，再放返入個大套入面。
16.響課室玩俄羅斯輪盤，將玩粉刷霑滿粉筆粉，放係風扇上面，等個風扇轉轉下，轉得快個時飛出o黎，睇下個粉刷中邊個。
17.放膠袋(當風爭甘放)。
18.去後梯執咸書睇，張睇完的咸書撕開飄落街。
19.貼張龜仔紙嚮o的同學。
20.踩人地個影。
21.狂踩人地對白飯魚，尤其是大肥仔果o的。
22.用幾條橡筋射。
23.掉人地門口的拖鞋落街。
24."蚊"消防喉，射水落下面個球場，睇下射到幾遠。
25.擇水彈。
26.用氣鎗射街上的途人。
27.玩千揪，"fing"到咁上下就飛出去鬥遠。
28.落樓梯時坐係o的扶手上面"sir"落黎。
29.在自動梯行相反方向。
30.把"誤投信件"或沒有用的宣傳單張，胡亂放入其他的住宅信箱。
31.坐地鐵時，抓緊中間的扶手，地鐵一開動博命繞住轉(自轉)。
32.在月台上鬥快跑。
33.帶玩具返學。
34.用圖釘弄穿學校壁佈板。
35.亂按人家的門鐘，然後鬆人。
36.明知過了三歲，仍然不買票，"捐"地鐵的入/出閘機。
37.用改錯水(很舊的有一個掃那種)附送的天拿水，搽在手上。
38.在井字型公屋中間的大天井中放紙飛機，或者放紙青蜒，看看誰放的紙青蜒最慢由廿幾樓落到地面。
39.煲蠟。
40.把汽水罐靜雞雞放在校車的車輪下攝住，開車時把它壓扁。
41.圍閹
42.呵尿時出力射走 D 屎積
43.將紙碎或者紙飛機撒落街
44.將bubble紙氣泡逐粒"鏈"爆
45.o係屋企走廊玩"壁虎功"
46.走到開動緊電風扇面前:"呀~~~~~~~~!"
47.用間尺好似 "搖搖板"咁彈起舊擦膠
48.寶貼當泥膠,用間尺整pizza
49.係屋企撩鼻屎然後抿落牆
50.將 d 擦膠碎用尺切粒粒
51.膠水搽係手/筆盒上 , 等佢乾之後成塊 met 出黎 ~
52.洗手時用手頂住個出水位,用d水去射周圍d人
53.同隔離位鬥快開哂筆盒d機關
54.飛拖鞋
55.特登將飲完的紙包飲品吹脹然後放在地上，大力地踩爆佢
56.用泥膠塞電制/電話插蘇

濟記出品，唔係腸粉 -- Monchowchow

詳見：http://heungyangossip.blogspot.com/2005/07/blog-post_08.html

傳說中的《翻天復地災難蟲》-- Monchowchow

詳見http://heungyangossip.blogspot.com/2005/07/blog-post.html

放假 - 燒賣

公司強制性清假, 難得有幾日人地返工我放假的日子, 可以好優閒咁食下 tea,買下野. 奈何天氣唔係太好, 如果唔係我可能去左郊外撲碟啦...
上圖係今日買的, 好多關節, 好好玩

我最喜愛的11齣愛情電影 -- Monchowchow

詳見http://heungyangossip.blogspot.com/2005/06/11.html

簡易Post相片方法 --- 櫻木花道

所有步驟和Post文章一樣, 分別只是在寫文章的方格上有個相片icon, Click了它就可以簡易attach相啦, 請大家試試! (這3張圖就是用上述的方法Upload的)

<<頭文字 D>> - 櫻木花道

尋日捉左Monchowchow去睇<<頭文字 D>>, 睇完之後除左叫「回水」外都唔知講乜好, 冇比Monchowchow鬧巳經算好彩。 講番套戲, D演員o既水準仲差過當年王老Wil套「沖涼骨,全港至得」(到最後我都係唔知o離套爛片叫乜名......請王大導覆)裏面D人, 最好戲個黃秋生剩係識得扮傻仔, 飛車埸面攞鏡角度又唔好, 內容情節亳無特出。全套戲唯一可取o既地方就只有D車, 間豆腐店同油站o既佈景做到同漫畫一模一樣。 2005年港產片開畫票房冠軍都係得咁o既質素, 香港電影o既前途真係......

今日有間叫 macau jockey club 打比我叫我 join member... - 燒賣

邊個放左我個 mobile 出去? 係咪奧利華條蛋散?

今天世界很美好 -- Monchowchow

窗外行電閃電落狗屎，我聽不到，只聽到自己心跳和球場木板吱吱聲…
在這橫風橫雨的日子，決定為朋友們獻上一直以來收收埋埋在心底的讚美：

好友流精靈聽明絕頂唔十九、大眼蘇珊青春可人甜組兒、小馬高正義大方、曲髮安風流瀟洒、夢幻左待人親切、搭上行事爽快火柴人，同房鬼馬la-Q魅力四射，手繞醒目姊妹馬交文、肥仔賓也是長袖善舞，終有一日等到失蹤人口KY美人龜；金花三朵中小辣椒出名溫柔、愛猫安誠實有禮、井底獅子內在美爆棚有口皆碑；最後更要感謝溫厚沉實八通堅、口齒伶俐書法超和心地善良變色龍，沒有您們的關照我絕對無法戀上身手敏捷頭腦靈活黃埔之花Bridget Li…

在這橫風橫雨的日子，縱然我涼薄依舊，還是要說聲今天世界很美好！

Mon Lonely 2有得睇啦！-- Monchowchow

Mon Lonely -2

勁 --- 奧利花‧迪克曼

http://www.storewars.org/flash/index.html

大災難 -- Monchowchow

1



如果識著個女朋友係咁，你地會點？

想不到獲得肯定的文章 -- Monchowchow

（今早又在SINA NBA網寫了一篇文章，寫來帶點個人自傳的氣味，真沒想過得到許多人的認同，也登了在SINA的新聞頁中… 有空就捧場吧！)

簡體版：http://sports.sina.com.cn/nba/ (在熱門評論，夾雜在什麼日報、午報、商報之間)

繁體版：monchowchow's blog（怪獸球評：去吧！橫掃活塞）

衝動--夢幻之左

近日學人煲日劇, 剛剛煲完套"在世界的中心呼喊愛", 套劇內容其實十分老土, 我唔想喺呢度詳述, 有興趣的話請click http://star1102.myweb.hinet.net/aki/summary.htm
講真雖然內容老土, 但真係有D感動, 同埋喺套劇可以搵番已經唔見左的衝動!
細路仔時, 會為左一時衝動, 做D傻事!
班際比賽,喺D女同學面前喊到收唔到聲!
同D亞Sir嘈交嘈到拆天!
為左一D好小時事, 同好朋友唔妥!
入左社會, 人變得圓滑,
但代價就係無左呢份衝動!!!

陳年往事之登山隊--Monchowchow

有時候無聊會search吓一些自己以前喜歡的玩兒，今日就一時記起了這款登山遊戲。
坦白講，我一直都唔記得名字（圖片可見它的"橋口杉手")，只記得它實在好玩…
遊戲主要是講玩家組織一支登山隊去挑戰世界各大山峰，作為隊長要招幕隊員(為了增加投入感，我把隊員都改為朋友的名字)、又要精心部署所須物資和行程計劃。至於登山過程真的是千辛萬苦，又暴風又山崩，於是乎好多時我就眼白白見住oliver摔死、又或在失去聯絡後數天尋回andy的屍首…
最遺憾就是我從來都未100%登頂成功 :(！最接近的一次，是macro走到山頂後沒有插旗就走翻落嚟，試咗幾萬次都係咁…　這令我諗起大學時跟燒賣兄去日本旅行，為了渡宿兩人夜媽媽在東京尋找傳說中的通宵戲院，好不容易看見一棟商廈的樓上好似有，叫他上去問問詳情。足足十五分鐘後先佢落嚟，然後攤開雙手抱怨：「完全溝通唔到！」…
雖然未必會再玩到呢隻game，但下次去日本都好想找尋一下它的攻略，好解我心中多年的鬱結咧。

晚餐 - by 燒賣

前兩晚食完飯發覺,原來我夜訓同飲左咖啡係無直接關係...
我都唔知點解要咁夜訓,明明無咩特別野做,但就係唔捨得死去訓...

Mon Lonely開始連載！-- Monchowchow

以後將只會post於我的個人blog中，敬請留意！

氹仔炮房殺人事件 - by 燒賣

以後我就用呢個名啦
macau

夢幻之左報到

因為懶, 鐘意食雞胸多過食雞翼!
因為懶, 次次沖涼都洗埋頭!
因為懶, 工作幾唔如意都無去搵新工!
因為懶, 所以到今日先上黎報到, 加上部NB無字符, 出POST都幾頭痛.
不過會努力!!

大家的反應...淡如水 - by 馬高

o岩o岩upload緊相就見到老wil個message, 如佢所言, 大家反應真係麻麻, 唔post新 message都可以 比 d comment, 難得有人咁有心一手一腳起左呢度出黎, 唔好淨係得個睇字啦.

to 老wil: 係我話 post 相有 d 煩, 唔係迪克曼
to 迪克曼: 你係邊個~~~~~~~~~~~~~~~~~~~~~~~~~~~~~~~~~~~~~~~~~~?

silas_prudence

真的是技術問題嗎？ -- Monchowchow

看見此blog開放至今反應冷淡，個人感覺都有點失望，而迪克曼提到可能是由於post過程比較複雜的原故…　雖然圖片是麻煩一點，但post文可說是無啥難度吧…
如果大家真有任何技術問題，不妨把文章／圖片e-mail給我由我代勞（最好是Monchowchow1124那個郵箱)…
坦白說我一直都不敢期望這個blog可以一步登天，令以往那十多人突然間經常來信，但相信大伙兒中確實都有著相當重視彼此的人存在…有些東西始終要靠自己的第一步，希望那些人會把握一下這個「雞」會！
迪克曼&馬高兄，坦白說看見你們的post我都好高興，不妨多post點文章，我一定覆。迪克曼兄，可有想過開個私人blog?如果你嫌blogger.com不好用（現在依然慢？），用可試試其他供應商。
這兩天都沒時間寫東西，一來要畫畫，二來要幫Chauli個blog裝修，明天倒要抽時間更新一下先得！

對版主的強烈要求 --- 蘭‧迪克曼

本blog名為JACKASS
又不禁令我想起了在咸豐年代由拍攝的兩部欄片
還記得導演無道, 拖欠演員工資不突止,
仲要私吞左ORIGINAL COPY.

強烈要求版主
還番隻CD出黎

好眼訓,試下post - by 馬高

手痛, 唔想打咁多字, 同埋 post 圖都幾煩, 要用 third-party software, 又要 share 同一個account...



toro

從馬刺太陽的對決看技戰水平的高下 --- Monchowchow

he he，又給刊登了… 但最衰是SINA個編輯竟然懶到沒有為我的文章開新頁，只是馬虎的在NBA新聞版中弄個超連結， 連接到論壇中我的文章就算，真有點氣！唯一的好處是因此令我知道文章的閱讀率 --- 才兩小時左右就點擊過萬 (！)，中國網民的數量真係唔講得少…
(相比這個blog的讀者群反應，真的差天共地…）


怪獸球評：從馬刺太陽的對決看技戰水平的高下(5/25 16:23)

我看NBA的西部生態 --- Monchowchow

每年看NBA的季後大戰就總有衝動寫一兩篇感想，早兩日手痕在中國的SINA的論壇中寫了篇文，怎知道後來給放了在SINA NBA新聞版的熱門評論中，雖然標題給無厘頭的加了一句「評價姚明需保持冷靜」(真係老土！)，不過無情情給「見報」，也是挺高興的。 （睇完記得落Comment！）

繁體版：http://heungyangossip.blogspot.com/（我的個人blog)

簡體SINA版︰http://sports.sina.com.cn/r/2005-05-24/10161576466.shtml

肥左!!!---葛‧迪克曼

唔知你地點, 但係我呢到LOGIN真係好慢, 等左好耐先入到離

十分讚同伯誠的 修補關係 提議
正如黃老wil的PROFILE一樣, 每天過著 正常 的生活
仿佛這樣的狀態會永遠維持下去似的
再不加緊 聯誼 一下
恐怕各自就會繼續埋首於自己的世界

lllc

p.s. 可能你地都用近, 最近找到一個叫"一搜" http://www.yisou.com的網站
有大量Mp3 download, 最重要係首首都真係可以DOWNLOAD到同聽到
得閒可以去看看

JOIN !! --- Monchowchow

各位好好好…

Build up our Group!! --- Monchowchow

這是我為 hall A jackass們開的blog， 所以這個blog是屬於大家的。

要post文章或相片，這在www.blogger.com登入。
username = 我們當年選宿生會時的組名，亦即是"南x"的英文。
password = "kayee的房號 + macro的房號"。

操作方式
(可能大家都識，又或者根本不用我教，但點都好，因為個blog 是大家有份，為免累街坊，我都要長氣d解釋一下)
post文章指引：
1. 登入後，選擇 "jackass 97"那個blog， (千萬不要按 "建立blog"，這樣只會加多另一個組)
然後在「張貼」欄下的「建立」中撰文，寫完後按"發怖文章"，再更新即可。
(為了識別，標題請用此格式: "article name --- your name"，正如本文 "Build up our Group!! --- Monchowchow"一樣)

post相片指引: (重要更正!!!!!!)
請下載軟件hello (下載地址：www.hello.com)，登入的username及password與上面blogger的相同
（註：雖然hello與blogger是不同的東西，但一個hello account好像只可向一個blogger放相，所以即使你們本身已有hello account，也應該必要用上述那個username登入才可向　"jackass 97"放相，因此，如果你用hello放完了相，請盡快登出hello。)
1. 先登入blog，再開啟軟件hello，可在「friends」欄中找到 "BloggerBot says,"Current blog: Jackass 97", 點選它，按"send pictures" ，按"use explorer"。選了要post的相後，設定格式，按"save"，到之後畫面的 "enter a caption for your photo here"下先隨便打些東西，"publish"鍵即會浮現，按下即可。（如有時不穩定會傳唔到，請再試）
2. 回到blog的網頁，在「張貼」欄下的「修改文章」中找回先前相片，加添真正的標題和文句即可。
(同一句，為了識別，標題請用 "article name --- your name"的格式）

落Comments 指引:
身份請用"其他"。

P.S，除非你好清楚自己識，否則不要改動整個blog的設定和範本！如果不喜歡blog 的名稱，可先提出修改。
我想一個blogger account應無法同時給多於一台電腦修改，所以post完後請即登出。（當然訪客瀏覽是絕無問題啦！） 而 hello account 也一樣。

最後最後一提，看過本文後，請盡快post一篇文章(最好有圖)，讓大家清楚您的加入和清楚運作。

Thank you!!